Dem kúnige fuͤre ich swar er wil den lib
ane min herze dc mv̊s hie beliben·
das hat bi ir zallen ziten ein wib·
von der moͤhtes vnser herre niht vertriben·
sit es nv mv̊s bi der schonen bestan·
so moͤhte si dem kúnige doch zeren·
mir haben verlan·
ir herze dc mine wil von ir niht keren·
Ich weis wol dc dú schoͤne ist so gv̊t·
si lat mich niht von ir schulden verderben·
ie doch alleine swie si mir dar vmbe tůt·
doh wil ich iemer nah ir hulde werben·
den willen bringe ich vnz an minen tot·
des moͤhte mich vil vnsanfte verdriessen·
dc were ein not·
solt ich des wider si niht geniessen·
Minú ǒgen mvͤssen dvr dc selig sin·
dc si an der gv̊ten so rehte ie gesahen·
vil manige tvgende vnd ir gvͤtlichen schin·
als ir von warheit die besten ie iahen·
ich han mich lange an si verlan·
vnd wil iemer genade an si sv̊chen·
dc mvͤze ergan·
swie si gebiete oder welle gerůchen·