Dem kúnige fuͤre ich ſwar er wil dē lib
ane min h̾ze dc mv̊s hie belibē·
das hat bi ir zallē zitē ein wib·
vō d̾ moͤhtes vnſer h̾re niht v̾triben·
ſit es nv mv̊s bi d̾ ſchonē beſtan·
ſo moͤhte ſi dē kúnige doch zeren·
mir habē v̾lan·
ir h̾ze dc mine wil vō ir niht kerē·
Ich weis wol dc dú ſchoͤne iſt ſo gv̊t·
ſi lat mich niht vō ir ſchuldē v̾derbē·
ie doch alleine ſwie ſi mir dar vmbe tůt·
doh wil ich iem̾ nah ir hulde w̾bē·
dē willen bꝛinge ich vnz an minē tot·
des moͤhte mich vil vnſanfte v̾dꝛieſſē·
dc w̾e ein not·
ſolt ich deſ wid̾ ſi niht genieſſē·
Minú ǒgē mvͤſſē dvr dc ſelig ſin·
dc ſi an d̾ gv̊tē ſo rehte ie geſahē·
vil manige tvgende vn̄ ir gvͤtlichē ſchin·
als ir vō warheit die beſtē ie iahē·
ich han mich lange an ſi v̾lan·
vn̄ wil iem̾ genade an ſi ſv̊chen·
dc mvͤze ergan·
ſwie ſi gebiete oder welle gerůchē·