De Blagwitzer Normaluhr.
Nee, heernse nur, was fer ä dummer Witz
Mer gestern is bassierd in Blagewitz!
Aen-faulen Gunden, der gern Leine ziehd,
Hadd׳ ich ämal uffs Hemde mich gegnied,
5Un 's war mer so hallwege ooch geglickd,
Denn zwanzig Merkchen hadder 'rausgerickd.
Nu mußd ich Sie in Leibzig sinn um siem
Un de Gardoffel war mer schdehn gebliem.
Se gehd Sie ähm nur noch mit Ach un Grach —
10Se is Sie ähm ä bißchen aldersschwach.
Ae Jahrer verzig haww ich se nu schon —
Ich grichdese bei der Gonfermahzjon.
Nadierlich warsch nich, wie das heide Sidde,
Ae goldner Gronomeder aus Glashidde.
15Bescheiden sein de Baden angedreden —
Es fehlde ähm an Besten, an Monehden,
Un unsereener grichde damals nur
In besten Falle änne Schbindeluhr.
Was nitzd's, wemmer den Dadbeschdand verschleierd?
20Das ahle Werk is beese ausgeleierd.
Die Uhr, die machd so ziemlich was se will;
Jetzd gehdse vor, denn nach, denn schdehdse schdill,
Gorzum, von ihr, da gonnd ich nich erfahrn,
Wie weid mer eegendlich in Dag nein warn.
25Gee Großes war zu sehn, gee Buwligum —
Nur änne Heerde Ginder deebsten 'rum,
Un die zu fragen, war ich nich erbichd —
Wer Ginder fragd, werd immer falsch berichd.
So sahk ich denn bedebberd mich un schdumm
30Nach Jemand mid än Daschenseeger um,
Als mer ä Blitz dorch mei Gehärne fuhr:
„An jeder Gärche is doch änne Uhr!"
Un die von Blagwitz, heernse, sehnse, schdand
Direkd vor mir, ä hebbchen linker Hand.
35Doch wie ich an das Zifferbladd geguckd,
Da haww ich Sie weeß Gnebbchen ausgeschbuckd.
's war gleich um an den Wänden nuff zu renn,
Denn änne Zahl, die war nich zu ergenn.
Bein Baue hammse hoch wohl nausgewolld —
40Da hammse denne 's Zifferbladd vergold.
Wahrscheinlich had's än hibschen Feng gegost,
Nu awwer is das ganse Ding verrost.
Das Zifferbladd, das had Sie ausgeschbield —
Mer gann nischd sehn un wemmer noch so iehld.
45Ich häddemer beinahe 's Maul verbrannd —
Denn is das nich ä arger Iwelschdand?
Da hilfd gee Fuddern nich, ha hilfd gee Mähr'n —
Der Iwelschdand, der muß beseidigd wärn!
Das Zifferbladd, das mißder weiß bemal׳n
50Un uff den weißen Grund gomm schwarze Zahl'n,
Un is de Gärche daderzu zu arm,
Denn missen andre Leide sich erbarm,
Un gommden Fromm der ganse Schbaß zu hoch,
Dann duhns verleichd de Adeisten ooch!
Fritzchen Mrweessesnich.