De Binnenalster.
Un wärn de Zeiden noch so schlimm —
Mir griechen doch ׳ne Binnenalster!
Da drinne werd nadierlich schwimm
Von Froschleech ä geheerger Qualster,
5Un wimmeln Quabben drinne ׳rum,
Die dun mer ins Aquarijum,
Wo sonst der Bärger weeden dad
In Freien seine quiekgen Sauen,
Da wern mer, hubbd Sie druff der Rad,
10Ae fermliches Venedig bauen,
Wobei mer nur vor eenen bangd —
Ob’s Wasser nämlich derzu langd.
Aus Scherweln, alden Gaffeemieln
Un so sahn mer an Berg endschdehn,
15An den de Gledderlust mer giehln,
Doch andersch isses midden Seen,
Denn wenn gee Wasser drinne is,
Denn had das Ganse geenen Schmiß.
Wemmer Sie Wassermangel hamm,
20Denn wern besetzd mid Liewesbaaren,
De schmucken Gondeln sich in Schlamm
Bein Sießholzraspeln festefahren.
Wennse gee Fischer heeme bringd,
Verzwadscheln beede unbedingd.
25Ooch vor de Micken is mer bang,
Wiense an schwielen Sommerdagen
De ganse faule Lubbe lang,
De Menschen bis nach Schgeiditz blagen.
Wie wärden, gäm se an in Schwärm,
30Sich unsre Venezjaner härm!
De Bleiße un de Elster genn
Doch schwerlich ׳s needge Wasser liefern,
Denn wemmersche ooch Flisse nenn,
Geheern se doch nich zu den diefern,
35Un’s Bahrebächelchen, herje!
Das bild doch sicher ooch geen See.
Nadirlich heeßds: „das is je Quadsch!“
Denn’s Dagebladd haud uff de Bauke,
Doch is das Ding mir broblemadsch —
40Ich hawwe nich de richdge Mauke,
Un soll an neien Guhdormsee
Ooch gloom, da sag‘ ich eefach: „Nee!“
Fritzchen Mrweesesnich.