Bin ich dir vnmere·
des enweis ich niht ich minne dich·
eines ist mir swere·
dv sihest bi mir hin vnd vber mich·
dc solt dv vermiden·
ine mac niht erliden·
selke liebe ane grossen schaden·
hilf mir tragen ich bin zevil geladen·
Sol dc sin din hv̊te·
dc din ǒge mich so selten siht·
tv̊st dv dc ze gůte·
sone wîsse ich dir dar vmbe niht·
so mit mir dc hǒbet·
dc si dir erlǒbet·
vnd sich nider an minen fůs·
so dv bas enmvgest das si din grůs·
Swanne ichs alle schowe·
die mir svln von schvlden wol behagen·
so bist dvs min frowe·
dc mag ich wol ane ruͤmen sagen·
edel vnd riche·
sint si svmeliche·
dar zv̊ tragent si hohen mv̊t·
lihte sint si besser dv bist gv̊t·
Frowe dv versinne·
dich ob ich dir zihte mere si·
eines frúndes minne·
dú ist niht gv̊t· da si ein ander bi·
minne entǒg niht eine·
si sol sin gemeine·
dc si ge·
dvr zwei herze vnd dvrh dekeines me·