Als ich stan vnd denke wa ich si hab gesehen·
dú minem herzen hat gesiget an vor manigen iaren·
so ist mir mit gedanken also wol geschen·
swenne ich si sehen 189r sol die reinen minneklichen claren·
so denke ich her so denke ich hin·
so denke ich iemer an die reinen svͤssen minnenklichen·
des wirde ich dike gar ane sin·
swenne ich si sehen sol als einen engel fúr mich slichen·
wol mich dc ich si ie so schone han gesehen·
si ist min tac min morgen rot min svnnen brehen·
min meien zit vnd alles das mir froͤide birt·
ei wol mich wart wol iemer wol· wol mich ob mir dú schone wirt·