Ahv́ nv kvmt vns dú zit der kleinen vogelline sang·
es gruͤnet wol dú linde breit zergangen ist der winter lanc·
nv siht man blv̊men wol getan an der heide vͤbent si ir schin·
des wirt vil manig herze fro des selben troͤstet sich dc min·
Ich bin dir lange holt gewesen frǒwe biderbe vnd gv̊t·
vil wol ich dc bestat han dv hast getúret mir den mv̊t·
swc ich din besser worden si ze heilen mv̊s es mir ergan·
machest dv dc ende gv̊t so hastvs alles wol getan·
Man sol die biderben vnd die gv̊ten zallen ziten haben wert·
swer sich geruͤment alze vil der hat der besten mâsse niht gegert·
io sol es niemer hoͤfescher man gemachen allen wiben gv̊t·
er ist sin selbes meister niht swer sin alze vil getv̊t·
Vf der linden obene da sanc ein kleines vogellin·
vor dem walde wart es lut do hv̊b sich aber dc herze min·
an eine stat da es e da was ich sach da roseblv̊men stan·
die manent mich der gedanke vil die ich hin zeiner frǒwen han·
Es dunket mich wol tvsent iar dc ich an liebes arme lag·
svnder ane mine schulde frǒmdet er mich manigen tag·
sit ich blv̊men niht ensach noch horte kleiner vogel sanc·
sit wc al min froͤide kurz vnd ǒch der iamer al zelanc·