Ahv́ nv kvmt vns dú zit der kleinē vogelline ſang·
es gruͤnet wol dú linde bꝛeit zergangē iſt der wint̾ lanc·
nv ſiht man blv̊mē wol getan an der heide vͤbent ſi ir ſchin·
des wirt vil manig h̾ze fro deſ ſelbē troͤſtet ſich dc min·
Ich bin dir lange holt geweſen frǒwe biderbe vn̄ gv̊t·
vil wol ich dc beſtat han dv haſt getúret mir den mv̊t·
ſwc ich din beſſer woꝛden ſi ze heilē mv̊s es mir ergan·
macheſt dv dc ende gv̊t ſo haſtvs alles wol getan·
Man ſol die biderben vn̄ die gv̊ten zallen ziten haben w̾t·
ſwer ſich geruͤmēt alze vil der hat der beſten mâſſe niht gegert·
io ſol es niemer hoͤfeſcher man gemachen allen wiben gv̊t·
er iſt ſin ſelbes meiſter niht ſwer ſin alze vil getv̊t·
Vf der linden obene da ſanc ein kleines vogellin·
voꝛ dem walde wart es lut do hv̊b ſich aber dc h̾ze min·
an eine ſtat da es e da was ich ſach da roſeblv̊men ſtan·
die manent mich der gedanke vil die ich hin zeiner frǒwen han·
Es dunket mich wol tvſent iar dc ich an liebes arme lag·
ſvnder ane mine ſchulde frǒmdet er mich manigē tag·
ſit ich blv̊mē niht enſach noch hoꝛte kleiner vogel ſanc·
ſit wc al min froͤide kurz vn̄ ǒch der iamer al zelanc·