Aber walt vnd ǒch dv́ heide
krankent an ir kleide·
winter wil si twingen
nachtegal dv́ lat ir singen·
vnd die blv̊t ir dringen
bi dem selben leide
klag ich mines herzen swere·
ǒwe die sint also hert·
was si mir von erst beschert·
das was mir gewere·
ICh ziehe als ein wib alleine
an svͤsse reine
wes wil si mich twingen·
kan mir stete lan gelingen·
vnd froͤide bringen
nach mins herzen meine
so hab ich der lieben hulde·
wan ich was ie an ir stete
sint das gen ir missetête·
so sint mine schulde·
Ja si minnekliche gůt·
kan so steten ir můt
svnder sich gelichen
das ir lib der minnenklichen
stete lat berichen
inrent halb der hůte
wand ir stete wibes guͤte
wirt so reine wibes minne·
das ich lichte noch gewinne·
von ir vro gemvͤte·