Aber walt vn̄ ǒch dv́ heide
krankent an ir kleide·
wint̾ wil ſi twingen
nachtegal dv́ lat ir ſingen·
vn̄ die blv̊t ir dꝛingen
bi dem ſelben leide
klag ich mineſ h̾zen ſwere·
ǒwe die ſint alſo hert·
waſ ſi mir von erſt beſchert·
das was mir gewere·
ICh ziehe als ein wib alleine
an ſvͤſſe reine
wes wil ſi mich twingē·
kan mir ſtete lan gelingen·
vn̄ froͤide bꝛingen
nach minſ h̾zen meine
ſo hab ich der lieben hulde·
wan ich was ie an ir ſtete
ſint das gen ir miſſetête·
ſo ſint mine ſchulde·
Ia ſi minnekliche gůt·
kan ſo ſteten ir můt
ſvnder ſich gelichen
das ir lib der minnenklichen
ſtete lat berichen
inrent halb der hůte
wand ir ſtete wibes guͤte
wirt ſo reine wibes minne·
das ich lichte noch gewinne·
von ir vro gemvͤte·