Audio dum Musam, quam tu meditaris avena
Varsavios inter, Tityrus alter, agros;
Non Latio invideo cantantem pascua vatem,
Namque habet hunc in te Sarmatis ora novum.
Estis uterque pares dulci modulamine; quamvis
Ille canat Latiis, tu Lechicis numeris.
Estis uterque pares: Daphnis cantatur utrique,
Ausoniis Daphnis Sarmaticisque modis.
Sed Latius Daphnis dudum cum vate recessit
Ex oculis hominum; nominis umbra sui.
Ille tuus vivit, pastorum gloria Daphnis,
Vivet et aeternum carmine, Adame, tuo.