Quisque solo acclinis mersisti in pulvere vultum:
Humidaquae illaesae pressisti lumina terrae.
Attollens oculos, trepido miracula visu
Concipe, et eximio causam committe patrono,
Nulla potest tantas complecti pagina laudes
Quanquam ipsa his titulis caementa et saxa notentur.
Terrenum non claudit opus quod regia coeli
Suscipit, et rutilis inscribunt sidera gemmis,
Martini si quaeris opem trans astra resurgens
Tange polum, angelicum scrutatus in aethere coetum,
Illuc conjunctum Domino perquire patronum
Sectantem aeterni semper vestigia Regis.
Si dubitas, ingesta oculis miracula cerne
Queis famuli meritum verus Salvator honorat.
Accedes reliquis inter tot millia testis,
Dum narranda vides, solers et visa retexis.
In sanctis quidquid signavit pagina libris
Instaurat renovante Deo, quo munere gaudent
Caecus, claudus, inops, furiosus, anxius, aeger,
Debilis, oppressus, captivus, moestus, egenus.
Omnis apostolicis gaudet curatio signis.
Qui flens adfuerit, laetus redit, omnia cedunt
Nubila, quod meritum turbat medicina serenat.
Expete praesidium, non frustra haec limina pulsas.
In cunctum perget pietas tam prodiga mundum.