123.0419A| Christe, precor, veniam segni des mitis alumno;
Tardus sum, tarde sed tibi nemo venit.
Longus praeteritis tenuit nos error in annis;
Sufficiat meritis haec, rogo, poena meis.
123.0419B| Vita brevis superest, in mortem et pronior aetas;
Jam peccare senex non queo, nolo tuus.
Sanctorum eximiis meritis precibusque beatis,
123.0420A| Quorum perpetuos memorat liber iste triumphos,
Da, Pater omnipotens, veniam, da, Christe, medelam
His qui supplicibus votis ac mente fideli
Committunt sese tantis per saecla patronis,
123.0420B| Qui zabulo victo, rutilis super astra coronis
Conspicui, de te, quidquid petiere, merentur.