425 In quadrum coeunt sulci, consistit aratrum:
fumantis niveus rictus attollit ad ulmum
taurus; lassa iugo sub eodem bucula mugit:
mugitu resonant nemorosi saxa Palati.
Pastorum medius palpat sudantis arator
430 terga bovis, puraque ferox innititur hasta,
dum latium prospectat agrum vitreasque paludes
et procul inde Albae declivia moenia Longae.
Proxima tam leni circum fluit Albula cantu,
ut sonitum pici libros tundentis acernos
435 adstanti referat sacri nemus Argileti.
Quernea collucet Tarpeio vertice silva,
qua decedentis flammatur lumine solis,
atque aquilae liquidum nigrescit forma per aurum.