Parvos non aquilis fas est educere fetus
ante fidem solis iudiciumque poli.
Nam pater, excuso saluit cum germine proles
ovaque maternus rupit hiulca tepor,
protinus inplumes convertit ad aethera nidos 5
et recto flammas imperat ore pati.
Consulit ardentes radios et luce magistra
natorum vires ingeniumque probat.
Degenerem refugo torsit qui lumine visum,
unguibus hunc saevis ira paterna ferit. 10
Exploratores oculis qui pertulit ignes
sustinuitque acie nobiliore diem,
nutritur volucrumque potens et fulminis heres,
gesturus summo tela trisulca Ioui.
Me quoque Pieriis temptatum saepius antris 15
audet magna suo mittere Roma deo.
Iam dominas aures, iam regia tecta meremur
et chelys Augusto iudice nostra sonat.