Dum literato ludis in otio,
Et castra doctae Palladis impiger
DELPHINE sectaris, futuros
Vincere jam meditaris hostes.
Bonas per artes, pectora dulcium
Formare alumnorum, asperioribus
Virtutis armorumque curis,
Pallas amat, teneris ab annis.
Imbelle nido sic genus erudit
Ales minister fulminis, arbitra
In luce, ad armorum fragorem, et
Grande ministerium tonantis.
Sic natus alti sanguine Pelei
Infans Achilles semifero manus
Submisit heroi, superbum
Ilion excidio daturas.
Sic in Lyceo per sophiae sacras
Deductus artes Amathius puer
Graecum, pharetratumque Persam, et
Terribilem superavit Indum.
Sic quae Latinis Annibalem ferum
Carthago quondam finibus intulit,
Doctique, Musarumque amantis
Scipiada male cessit armis,
Altam Quiritum per sapientiam,
Ac literatos sic quoque Caesares
Se Roma tum demum subacto
Imposuit metuenda mundo.
DELPHINE, quam non gloria lauream,
Quas fata palmas non tibi destinent?
Si quando formatus per artes
Egregias, facilesque Musas,
Orbi regendo veneris. Ilicet
Hoc sperat à Te Rex pater, et suae
Virtutis inspirare nato
Magnanimos bene coepit ignes.