Lusus — VI. Thyrsidis vota Veneri

Quod tulit optata tandem de Leucade Thyrsis
Fructum aliquem, has violas dat tibi, sancta Venus.
Post sepem hanc sensim obrepens, tria basia sumpsi:
Nil ultra potui, nam prope mater erat.
Nunc violas, sed plena feram si vota, dicabo
Inscriptam hoc myrtum carmine, diva, tibi.
'Hanc Veneri myrtum Thyrsis, quod amore potitus,
Dedicat, atque una seque suosque greges.'