(0297A)Hic celebranda rudis florescit gloria templi,
Limpida quae sacri signat vexilla triumphi;
Hic Petrus et Paulus, tenebrosi lumina mundi,
Praecipui Patres populi qui frena gubernant,
Carminibus crebris alma venerantur in aula.
Claviger aetherius, portam qui pandis in aethra,
Candida coelorum recludens regna Tonantis,
Exaudi clemens populorum vota precantum,
Marcida qui riguis humectant imbribus ora;
Suscipe singultus commissa piacla gementum,
Qui prece fragranti torrent peccamina vitae.
(0298A)Maximus en doctor Paulus, vocitatus ab axe
Saulus, qui dictus mutato nomine Paulus,
Cum cuperes Christo priscos praeponere ritus,
Post tenebras claram coepisti cernere lucem;
Vocibus orantum nunc aures pande benignas,
Et tutor tremulis cum Petro porrige dextram,
Sacra frequentantes aulae qui limina lustrant;
Quatenus hic scelerum detur indulgentia perpes,
Larga de pietate fluens et fonte superno,
Dignis qui nunquam populis torpescit in aevum.