(PL 19 0378A)
Permotus precibus vates discedere cunctos
Imperat, ac sese germanum fratribus infit.
Defixi riguere metu, tacitoque reatu
Damnantes sese, cohibent formidine voces.
1360Prolectat mox ille reos, propiusque vocatis,
Exigit, ut dicta portent placitura parenti
Quae sint, quae fuerint, quae mox ventura ferantur:
Instigans, migrare semen, gregibusque coactis
Vicinos Arabum colles venientibus offert.
1365Ut quia continuo tellus foret arida lustro,
Pasceret agnatos congestis frugibus omnes. (0378B)
Ista edicta viri laeto rex pectore noscit,
Iosephumque rogat, charorum assumere turbam,
Et gratuita iubet germanis tradere farra.
1370Dantur plaustra viris, frumenta, pocula, panis,
Magnaque gestantes desudant pondera muli.
Dantur quinque togae Beniamino, et quinque parenti,
Tercentum et nummi signata incude notati.
Ast alii iuvenes mercedis laude secunda
1375Accipiunt geminos nivosae vestis amictus.
Haec ubi cognovit genitor, data munera sumens,
Respirat patria festinus cedere terra.