Venator iucunde nimis atque arte ferarum
Saepe placens, agilis, gratus, fortissimus, audax,
Qui puer ad iuvenes dum non advixeris annos,
Omnia maturo conplebas facta labore.
Qui licet ex propria populis bene laude placeres, 5
Praestabas aliis ut tecum vincere possent.
Tantaque mirandae fuerant tibi praemia formae
Ut te post fatum timeant laudentque sodales.
Heu nunc tam subito mortis livore peremtum
Iste capit tumulus quem non Carthaginis arces10
Amphitheatrali potuerunt ferre triumpho!
Sed nihil ad Manes hoc funere perdis acerbo.
Vivet fama tui post te longaeva decoris
Atque tuum nomen semper Carthago loquetur.