112.1660D|Sanctorum pariter promite principum
Natalem, socii, psallite laudibus,
Insignemque triumphum
gaudentes sonitu date.
Hoc poscit utique inclyta gloria
Tantorum comitum Regis et optimi,
Cum quo lucis in arce
laeti perpetuo manent.
Nam Petrus titulum erigit arduum,
Cum pro laude Dei claviger aetheris
112.1661A| Exsultat generosus
coeli regna potens tenens.
Cujus perpetuus exstat et inclytus,
Paulus nam socius, doctor et optimus,
Christi vas pretiosum
et rector populi Dei.
En quos iste vocat, ille supra locat;
Quos Paulus adhibet, hos Petrus inserit:
Christi testis uterque est,
coeli civis et incola.
Christum morte crucis nam sequitur Petrus,
Cum caesus capite Paulus et horride est,
Victores caput unum
ambo rite tenent Deum.
Nos horum precibus, Christe, piissimis
Te dones citius poscere coelitus;
Absit quod scelus omne
et cuncta veniant bene.
Immunes manibus simus et actibus,
Sensum corde pium confer et optimum,
112.1661B| Ut te rite colentes
cernamus Dominum greges.
Cujus orbis honor, cujus et aethera,
Cujus vita salus, et bona maxima,
Est cui nomen in aevum,
regnum perpetuum simul.
Sit Patri ingenito gloria maxima
Sit Nato pariter consona gloria,
Cum Flatu simul almo
per cuncta pie saecula.