Surgeret in thalamum ducto cum Pelion arcu
nec caperet tantos hospita terra deos,
socer aequoreus numerosaque turba sororum
certarent epulis continuare dies
praeberetque Iovi communia pocula Chiron, 5
molliter obliqua parte refusus equi,
Peneus gelidos mutaret nectare fontes,
Oetaeis fluerent spumea vina iugis,
Terpsichore facilem lascivo pollice movit
barbiton et molles duxit in antra choros. 10
Carmina nec superis nec displicuere Tonanti,
teneris nossent congrua vota modis.
Centauri Faunique negant. Quae flectere Rhoecon,
quae rigidum poterant plectra movere Pholum?
Septima lux aderat caelo totiensque renato 15
viderat exactos Hesperus igne choros:
tum Phoebus, quo saxa domat, quo pertrahit ornos,
pectine temptavit nobiliore lyram,
venturumque sacris fidibus iam spondet Achillem,
iam Phrygias caedes, iam Simoenta canit. 20
Frondoso strepuit felix hymenaeus Olympo:
reginam resonant Othrys et Ossa Thetin.