Theologus Dantes, nullius dogmatis expers
quod foveat claro philosophia sinu,
gloria musarum, vulgo gratissimus auctor,
hic jacet et fama pulsat utrumque polum:
qui loca defunctis gladiis regnumque gemellis
distribuit laicis rhetoricisque modis.
Pasua Pieriis demum resonabat avenis;
Atropos heu laetum livida rupit opus.
Huic ingrata tulit tristem Florentia fructum
exilium vati patria cruda suo;
quem pia Guidonis gremio Ravenna Novelli
gaudet honorati continuisse ducis.
Mille trecentenis ter septem Numinis annis
ad sua Septembris idibus astra tulit.