Quo tandem meus avolavit ille,
Formosissimus ille Natus, ille
Quo tandem meus avolavit Infans?
An jam Bethlemium reliquit antrum,
Natalesque casas, et hospitalis
Fortunata petit fluenta Nili?
Obstent culmina, fabulosus obstet
Haemus, Pelion, Ossa, Pindus, Othrys:
Ut pulsum celer assequar Puellum,
Nimbis ocior, ocior procellis
Pergam: per saliceta, per rubeta,
Per deserta, per asperos hiatus,
Per spineta, per iliceta pergam.
An rursus, Pharias perosus oras,
Damnato redit exul e Canopo,
Tranquillamque petit redux Idumen?
Ut pulsum celer assequar Puellum,
Stent inter scopulique, frondeisque
Silvae verticibus minentur inter;
Damis ocior, ocior capellis,
Vadam: per fruticeta, per vepreta,
Per dumeta, per invios recessus,
Per querceta, per aesculeta vadam.
An late Solymas peragrat oras,
Et pinguis juga calcat Hermonaei?
Carmelique super nivale tergum
Formosis spatiatur in viretis,
Qua circumfluus elegante ripa,
Singultantibus evolutus antris
Jordanes sonat, et remurmurantes
Sese fluctibus alloquuntur undae?
Ut pulsum celer assequar Puellum,
Pardis ocior, ocior leaenis
Curram: per siliceta, per fruteta,
Per pineta, per obvias paludes,
Per saxeta, per arboreta curram.
An nostri vitiis iniquus orbis
Centum Taenarios triumphat hostes?
Stellarumque procul favente pompa
Phoebi scandit equos, et ordinata
Molli sidera temperat capistro?
Ut laetum celer assequar Puellum,
Fulgetrisque, curulibusve flammis,
Aurigantibus Africis et Euris,
Et blandis Zephyris Favoniisque,
Per lenes ferar inquietus auras,
Et desiderii vehente penna
Spirantum vehar essedo Notorum,
Vernarumque rotis Etesiarum.
Sed quo me rapit incitatus ardor?
Ambo ludimur, ambo: dum Puellum
Quaero, quaerit et ipse me Puellus,
Et vastos procul obsecrat recessus,
Obtestatur agros, nihilque de me
Respondentia sciscitatur arva:
Sic et me fuga ludit et Puellum.
Stabo: quemque vagum nequit, videbo
An possit Deus invenire stantem.