Epigrammata (Piccolomini) — 68. epytaphium ducis venetiarum

Franciscus Veneti dux et tutela senatus
Qui fueram: parvus me lapis iste tegit.
Eloquio valui (fas est me dicere de me,
Post obitum nullus si mihi livor obest).
5 Me duce que fuerat Venetis incognita tellus
Iam patet: imperii terminus Abdua iam est.
Non me dux Ligurum, non armis Genua vicit,
Victa sub auspitiis sed fuit illa meis.
Quid modo sim, queris? Nil sum, sed gloria reges
10 Si iuvat extinctos, me quoque fama iuvat.