Quem meus aligera venator cuspide cervum
Perculerat, ravi diripuere lupi.
Omine perturbor, ne forsitan improbus hostis,
Petre, tibi sacras depopuletur oves.
Astra minantur idem; sed tu sanctissime mundi
Ianitor, in melius, tristia monstra, refer.
Summa tibi terrae, coeli est tibi summa potestas,
Solvere sive aliquid, sive ligare velis.
Quodsi non aptas, haec ad tutamina claves
Causaris, gladium te prope Paulus habet,
Armato manda collegae praelia inermis,
Ille tuum stricto proteget ense gregem.