(0769C)
[Kal] Junii origo tuum sustollit in astra nitorem,
Pamphile, martyrio doctor venerande beato,
Martyris huncque diem festum Nicomedis adornat,
[IV non.] Marcelline sacer, Petre exorcista quaternis
Nonis communem dignamque litatis ad aram,
Lugdunique pio Blandina vocatur honore,
Quadragena quae simul octonaque coruscum,
Cum plebe nexit flammis undisque monile.
[III non.] Pergentinus item Laurentinusque cruoris
Et generis ternas gemino fulgore venustant,
Aureliana suum plebes recolitque Liphardum.
[II non.] Martyr et antistes pridie sacra vota Quirinus,
Accumulans proprio Christum de sanguine placat,
[Nonae.] Nonis antistes fulget Bonifacius, Anglis
Editus, ad Christum Oceani qui traxit alumnos,
Eresonum puro submittens colla lavacro.
[VIII id.] Octonas idus Ceratus episcopus ornat,
(0770C)Urbem qui fulsit Gratiano principe dictam.
[VII id.] Paulus septenas, praesul tuus, alta Byzanti.
[VI id.] Progenies meritumque pium quos jungit et ara,
Gildardus senas pariterque Medardus honorant.
[V id.] Quinas primus habet, juncto sibi Feliciano.
[IV id.] Quartae Basilide, et his deno martyre vernant.
[III id.] Barnabas ternas exornat apostolus idem.
[II id.] Cyrinus pridie effulget Nazarque Naborque,
His et Basilidem festo sociamus eodem.
[Idus] Idus illustrat Felicula virgo cruore,
Lac, Petronella, tibi verbum, quam junxit et aetas.
[XVIII k.] Octavo Juli et deno ante exordia mensis,
Vates Heliseus, simul Abdiasque refulgent,
Hic quoque Valerio et Rufino martyre gaudet.
[XVII k.] Septeno deno Vitus cum virgine clara
Margarita martyrii splendore nitescit,
Hocque Modestus et alma nitet Crescentia virgo.
[XVI k.] Sedecimo Cyricus Julitta cum genitrice
Clarescit vera Christi pietate fideque.
(0771A)[XV k.] Quindecimus septem, quinquagenisque ducentis
Martyribus jucundam mittit ad astra coronam.
[XIV k.] Quartum cum deno pretioso sanguine fratres
Marcellianus pariter Marcusque sacrarunt,
Hunc quoque Balbinae lustrat meritumque decusque.
[XIII k.] Gervasius terdenum Protasiusque coronant.
[XII k.] Vitalisque pater natos sequitur duodeno.
[XI k.] Martyr Rufinusque undeno et Martia pollent
[X k.] Albanus decimo defendit laude Britannos.
Paulinusque Nolam meritis et nomine lustrat.
[IX K.] Anglorum nono Ediltrud de germine fulget.
[VIII k.] Octavo natus colitur Baptista Joannes.
[VII k.] Septeno Romam Luceia exornat amore,
Scampio bis deno et bino martyre laeta,
De quibus Aceias socio conlucet honore.
[VI k.] Sextum martyr habet Paulus simul atque Joannes,
Germine, amore, fide, virtute et sanguine fratres,
Cum quibus augusto radiat Constantia serto,
Salvius et sanctus Scalditum littora visit.
[V k.] Hesperiam quinto antistes martyrque Zoelus
Martyribus cumula junctus denisque novemque.
[IV k.] Praesule quartus ovat verbi et doctore Leone.
[III k.] Tertius auralam sustollit ad aethera Romam
(0771B)Martyrio pariter Petri Paulique beato.
[II K.] Lemovicum pridie colitur Martialis honore,
Junius his celsum festis determinat orbem.
Junius imbrifugo aestatis sub caumate fervens,
Templa, quibus festa velet de fronde canemus.
Tellurem curvo Junius proscindit aratro.
(0772A)Ardentis penetrat quoque Phoebus sidera Cancri.
Centra hic Solstitium medio, summoque coruscat.