Dic Christi Veritas,
dic cara raritas,
dic rara Caritas,
ubi nunc habitas?
aut in valle Visionis,
aut in throno Pharaonis,
aut in alto cum Nerone,
aut in antro cum Timone,
vel in viscella scirpea
cum Moyse plorante,
vel in domo Romulea
cum bulla fulminate?
Bulla fulminante
sub iudice tonante,
reo appellante,
sententia gravante,
veritas opprimitur,
distrahitur et venditur,
iustitia prostante.
itur et recurritur
ad Curiam, nec ante
quis quid consequitur,
donec exuitur
ultimo quadrante.