135.0547|
135.0547C| Multa Palaestinam constat decorasse tropaea,
Ex quo progressi mundum ornavere triumphis
Signiferi insignes Christi, pietate viriles;
Qui mundum et mundi proceres sub sceptra prementes,
Hanc palmis vacuam non abjecere negatis.
In qua victores veterique novaque coruscant
Lege Patres, quorum paucos coluisse relatu
Me fateor stricto, lepida nec luce polito,
Nam licet antiquis pictoribus atque poetis
Quaelibet audendi fuerat quondam aequa potestas,
Pauca magis cupiam strictim, sed vera profatus,
Sirmate quam longo reperiri falsa secutus.
Unde nec admisi ut canerem certamina quorum
135.0547D| Non titulos ulla inveni in regione notatos
Incerta quorumve leguntur ab urbe triumphi.
Propterea Fabium rutilant solemnia, cujus
Extrema cum solis humum face Julius urit
Caesareae expositae non assignavimus urbi,
135.0548C| Caesareae quoniam plures a Caesare dictae,
Et quam sacrarit jugulo non legimus harum.
Traditur at Christi certamine fortiter usus.
Praesidis ipse quidem quia sumere signa recusat,
Truditur in tetro fortis sed carcere miles;
Post aliquotque dies hinc sistitur ante tribunal,
Scitatur semel atque iterum, duratque fidelis.
Mox jugulo plecti furibundo a judice jussus
Percutitur gladio, capitali lege subactus.
Tum ne detur humo servant custode cadaver,
Reticuloque situm salsis maris inditur undis.
Post triduum mersum corpusque caputque deorsum
Reticulo, sed sub Domini virtute revulso
Sacrato capiti redhibentur membra beati
135.0548D| Et scapulis cervix servatis jungitur ictus
Indiciis, totumque simul revocatur arenae
Littoreae, blandis oneri famulantibus undis,
Integroque pii cultus sepelitur honore.