135.0521|
135.0521A| Aediculas isthic perlustrat Paula Philippi
Levitae, ex septem qui munia clara sacrorum
Cum Stephano coepere, aris, qua lege minister
Editus, aeterni non cessat semina verbi
135.0521B| Spargere per populos, et oves ad ovile vocare:
Plurima signa gerens, virtutum luce coruscans,
Daemonas expellens, paralytica corpora curans,
Restituens gressum claudis ac lumina caecis.
Ille Samaritum fidei fundamina firmans
Instruxit, monuit, Simonisque venena fugavit.
Angelico ductu properans, hinc pergit ad austrum,
Aethiopemque tuens eunuchum sacra legentem,
Divino monitu carpento jungitur, atque
Sollicito studio sociatur apertio legis.
Dum veteres sitiuntur aquae, fons panditur ortus
135.0522A| Esse novus poto quo pectora sicca rigantur;
Mutavitque atram, tinctus baptismate, pellem
Hic niger eunuchus, gentilia corda figurans.
Bethsoros est vicus Solymis qua pergitur Hebron,
135.0522B| In quo fons cujus sacrantibus elutus undis
Candida praeclarae meruit consortia vitae.
Spiritus abripiens alias transferre Philippum
Destinat, Azotiis reliquisque, ubi verba salutis
Disserit allegans urbem dum transit ad istam
Aedificans in qua mentes requievit, et ejus
Tres juxta genitae, cum virginitatis honore
Sortitae tumulos; Ephesina quarta renidet:
Spiritus ipse prophetiae quas munere sanctus
Implens, illecebris diri servavit ab anguis
Aethereisque choris coeli super astra jugavit.