135.0741|
135.0741C| Patre sub hoc Romam veniens urbe Antiochena
Timotheus, Christum per compita, per fora pangit,
Dapsilis hunc juvenis sanctae pietatis amator
Silvester, cupiens attollere laudibus ardet,
Plurima qui postquam populorum corda sacrando
Continuo hic anno Christum, et quadrante fatetur,
Tentus laude crucis praefecto traditur urbis,
Verberibus sectus, longo squalore catenae
Tritus, ac invictus mulctam ter judice sumens,
Fortia suppliciis solidans ter pectora saevis,
Morte sequens Dominum saevis in funere mixtum,
Probrosos inter capitali caede coruscat,
Ut spinas inter rutilans rosa fulgurat hirtas.
Intempestivo Silvester noctis abacta
135.0741D| Membra domum referens, papa cleroque vocato,
Martyrium excubiis, divis quoque dedicat hymnis.
Corpus humo mandat proprio veneranda Theonem,
Asciscens horto secus inclyta pignora Pauli,
Cui pro discipulo socium cognominis addit,
Basilicaeque domu venerabile funus honorat.
Deficiens praefectus in hunc, in pectora torquet
Hospitis arma pii, dimissa talenta reposcens
Poenis impliciti, vincto graviora minatur
Nec postquam addiscit non adduxisse crumenas
135.0742C| Punctum, sedet ira fremens, invisaque jura
Nominis objectat, terrens sacrare sacella
Ni petat, efflabit tormentis caede propinqua:
« Suppliciis (Silvester ait) hac nocte labantem
Famina diva ferunt animam de sede revelli
Cordis stulte tui, quo pectora torva resultas,
Protinus aeternae subiture pericula mulctae,
Ut caesos gaudere videns sine fine gemiscas,
Et quae inflixisti sub puncto, intermine sumas,
Infelix quos punisti tuerere beatos. »
Tarquinius dapibus discedit inane replendus;
Silvester ferro properat sub honore premendus.
Interea poscente pio, prandente severo,
Judicium summa rectum procedit ab aethra,
135.0742D| Gaudiaque in poenam, poenamque in gaudia vertit.
Denique deliciis ventrem infarcire paratis
Gutturis annitens avido praefectus hiatu
Os piscis rapiens incauta fauce volutat,
Interius raptare volens conamine nullo
Proficit egerere, assurgens nisu urget inani,
Methodici, empyrici, logicique dolore jubente
Acciti, nulla gaudent ratione medendi:
Carmina nulla valent, nulla experientia prodest
Tortus et ad medium noctis horroribus actus,
135.0743A| Tetram tartareas animam demittit in umbras,
Ad poenas poenis, cruciatibus ad cruciatus
Cogitur, ad tenebras mundi de luce superbus.
Eximitur tenebris, exitque ad lumina justus.
Ducitur ille rogo qua verbera voverat hora,
135.0744A| Privati Dominum juris plangente tumultu;
Ducitur iste domum, quo tempore saeva putatus
Flagra subire, poli toto plaudente senatu,
Victorem quoque livores reverenter adorant.