135.0641|
135.0641B| Tempore virgo sub hoc Seraphia passa renidet,
Sanguine quam generis signavimus Antiochenam.
Illam, dum laribus fovet hospes clara Sabina,
Juncta Valentino, quondam cui fama decori
135.0641C| Principe nata metallorum praesignis Herode
Praesidis audita rapiunt laude officiales;
Facta viro praesens, dis sacrificare jubetur.
Illa: « Deum timeo, Dominum colo cuncti potentem,
Qui coeli terraeque sator; nam numina vana
Queis libare jubes, non dii, sed daemones exstant;
Nec licet hos orare mihi, quae servio Christo »
Dumque fidem celsam dictis attollit apertis,
Lascivis stupro geminis mandatur ephebis,
A quibus obscuri in penetralia caeca cubilis
Clauditur; utque petunt inceste attingere castam,
Intima concusso tellus eliditur antro,
Exanimesque ruunt omni virtute relicti.
Ast ubi jam rediens terris aurora virisque
Purpureo vehit ore diem, cognoscere factum
135.0641D| Praesidis ingressi sanctam invenere ministri
Instantem precibus, stratos ut morte petulcos;
Dumque opus aethereum mirantes undique multi
Visere concurrunt, praeses jubet ante tribunal
Victricem subigi, ferrique stupore jacentes;
Quos votis tetigit mandans ita virgo profusis:
« Surgite, et in Christi consistite nomine recti. »
Actutum, velut excusso pulsoque sopore,
Incolumes surgunt pedibusque insistere gaudent.
Cognitor, ut mulier, rogitat, mutaverit illos,
135.0642B| Amentes dederit, virtute resolverit acta,
Illi: « Sol velut ingressus resplenduit alte,
Praecellens juvenis mirus visuque decorus,
Nos inter qui se objiciens istamque puellam,
135.0642C| Defectu fulgore suo nos atque tremore
Concussit. » Judex furiatus subdere divis
Praecipit hanc animum, quod agat nisi, fata minatur
Patris. At illa: « Tui Satanae nunquam impleo jussa,
Christi praecipuo quae nomine fulta resulto. »
Lampades invictae jubet apponantur utrinque
Ardentes lateri; maturantesque ministri
Pone cadunt, forti rabiem vincente puella.
Attollensque iterum caput, haec exsibilat anguis:
« Pare clam, biothanata, et maga, legibus aequis
Effugere ut valeas poenas consultior atras. »
Illa: « Bioth natos (reddit) vos esse probatur,
Praestigiisque nigros, vivum verumque negatis
Qui Dominum, larvasque colendo peribitis ipsi
Haerentes; ego supremo Dominoque Deoque
135.0642D| Offero sacrificans. me me dignetur ut ipse
Sumere, peccatrix licet, at sum vernula Christi. »
Caeditur hinc duris robusta virgo bacillis,
Ponderibusque flagellatis humus intremit imis,
Et pavefacta piam collidere virga puellam
Frangitur, ac valido lumen petit impete diri
Praesidis, atque attrita gravi pupilla dolore,
Caecum corde notat restincto lumine luscum.
Ille furens cruda demptae facis acriter ira,
Lege velut posita capitalis ut ultio tollat,
135.0643A| Temnentem dictat proceres et publica jura,
Dans magicis patrata Dei virtute figuris.
Hanc rursus metam mox clara Sabina petentem
Prosequitur Christi fidei devincta per ipsam,
Cui praeses: « Quid dedecoras, vilemque fateris
Hoc temet quo Christicolis connectere cultu,
Conjugii monimenta decusque oblita parentum,
Aspernansque deos quorum te incurrere motus
Horreo? Quin remea propriasque revertere ad aedes,
Atque relinque magam quae multos artibus atris
A cultu removens fecit secedere divum. »
Alma Sabina: « Hujus, pravam quam fare, puellae
Artibus o suasus, veluti sum suasa, valeres,
Impia spurcorum simulacra probare deorum,
Et verum cognosse Deum qui, praemia justis
135.0643B| Aeternae tribuens lucis, dat Tartara pravis. »
Haec ad verba verens praeses sinit ire Sabinam.
Virginis illa piae finem palmamque triumphi
Exsequiis celebrans dignis claroque nitore,
135.0644A| Relliquias capiens pretioso munere claustrum
Condecorat mausolei sibi rite parati;
Huncque interpositis aliquot comprensa diebus,
Sistitur Elpidio, censor qui his hanc rogat orsis:
« Tunc Valentini quondam praeclara Sabina
Uxor, et illustris proles Herodis haberis? »
Illa: « Ego sum, grates Christo laudesque rependo,
Qui peccatricem me sordibus eruit atris,
Serva nitens ejus dum me Seraphia vinclis
Absolvit lemurum, Dominum dans noscere verum. »
Queis bile incensa sententia judice dicta,
Praetentis procerum probris temptuque deorum,
Et caedi gladio fortis decreta Sabina,
Egregiae dotes titulis fiscalibus addi,
Cujus ab illustris meriti sublata locantur
135.0644B| Membra viris ipso quo condiderat venerandae
Ossa suae tumulo fidei pugnaeque magistrae,
Arcus Faustini, Jovis area Vindiciani.