135.0653|
135.0653A| Tunc Pontianus, Eusebius et compares,
Vincentius, Peregrinus, alta martyres
Macti lucratu subiere sidera;
Qui censa coelis intulere terrea,
Primo expediti sumerent ut coelica,
135.0653B| Et lucra coelis ut queant impendere,
Centuplicanda student talenta expendere.
Queis mox senator additis acquiritur
Regi superno Julius domesticis,
Rufinus unda quos sacravit presbyter,
Doctus magistris integris fit integer,
Miles senator Regis alti, et particeps
Regni caducis quod paravit copiis
Onerosa celsi tramitis docentium,
Tradens egenis per manus obstacula,
Dans terrulenta, et comparans coelestia,
Fugitiva spargens, sempiterna colligens.
Quod imperator aure sumens Commodus
Jubet hunc teneri iratus, et Vitellii,
135.0653C| Peditum magistri, tradit audientiae,
Opes requirat eumque flectat delubris;
Tribus dat ille quem diebus carceri,
Posthac catenis mandat actum assistere.
A quo orsa capiens alta, dura, vivida,
Caedi severis tandiu egit fustibus,
Dum liberum transmittit astra spiritum
Senior supernae dedicatum curiae.
Pii magistri corpus almum colligunt,
Interque busta collocant Calepodii.
Hinc comprehensi cognitore Vitellio,
Dum pensiles librantur equuleo eminus,
Nervisque distenduntur artus fortibus,
Crudeliterque macerantur fustibus,
Flammisque latera conflagrant atrocibus.
135.0653D| Tuetur ista sub palaestra carnifex,
Stantem mederi Antonius cum spongia
Juvenem piorumque allevantem vulnera:
135.0654A| Clamatque: « Deus est Christus quem praedicant; »
Clamat, deinde clanculam petit fugam,
Quem confitentem fonte Rufinus sacro
Lavit. Reversus ad tyrannum libere
Dum Christianum se fatetur, plectitur,
135.0654B| Jugulique ad astra mittitur sententia,
Viaque terrae lata membra Aurelia.
In laude Christi immota stat sodalitas
Robusta, seu suspensa, seu remissior,
Nec fracta duris, nec subacta mollibus.
Furiatus ergo censor abscindi ferus
Plectrum beatae vocis Eusebio jubet;
Sed jura Christi internecare non valet,
Datorque linguae suffit oris munia,
Et absque lingua verba linguae procreat,
Clamatque sectus voce testis integra:
« Tibi sempiterna, Jesu Christe, gloria. »
Septis retrusi post agonem carceris
Laudes datori personant victoriae.
135.0654C| Sic dum diebus ac resultant noctibus
Quidam sacerdos Lappulus Capitolii,
Obsessus annis caecitate quattuor,
Venit tenebris et recedit lumine,
Illuminatus corde, cernens corpore.
Ergastuli patrata Simplicius videns
Servator, aris daemonum renuntiat,
Passusque Christum mente lotus candidat.
Quae gesta judex nuntiat dum Commodo
Ut puniantur mandat ille concito.
Post ad coronas evocati martyres,
Scelerata fertur petra qua metam petunt
Illicque plumbo vota caesi corpora,
Molesta linquunt, laeta scandunt domata.
Quorum resumens membra Rufinus sacer
135.0654D| Sexto recondit ab Urbe milliario.
Mucrone Mediolanus hoc sub tempore
Faustinus actus transit astra sanguine.