135.0843|
135.0843B| Immensae pietatis opus qua laude feremus
Paulini per prona Dei vestigia Christi,
Tramite vix trito, at mira virtute secuti,
Dogmate fulgentis, contra hostica tela vigentis?
Princeps Ecclesiae viduae se addicit egenae:
Servus sponte datus, ponat quo vincula servus;
Colla jugo pressat, servi quo colla resolvat;
Captivum legat se, ut captum praedo remittat;
Servitiis instat regum, sed regmina librat;
Subjicitur Domino, sed praestat honore tyranno;
Culmina disponit, famulatur, et imperat idem;
Hortorum cultor, regum datur ordine rector,
Nutritorque olerum censet moderamina regum,
Imperitans populis flecti se altore tuetur
135.0844B| Graminis injuncti, saevumque amittere verber
Judicio servi dominorum sceptra regentis.
Erigitur rastris, cultis abducitur hortis,
Regibus excolitur, famulus dare vota rogatur.
Ille animas auro praeponens, pro grege capto
Poscit; adunantur dispersi, munereque aucti
Mittuntur patri, navesque dapesque feruntur;
Stipatusque ovium laetus redit agmine pastor.
Et qui pro famulo sese subjecerat uno,
Pluribus ereptis, liber cum plebe remigrat:
Servitio multos redimens quod legerat unus.
Cujus mirificam divino lumine vitam
Mors pretiosa probat, trepidaeque vibratio cellae,
Mella recessuri labiis admota Joannis.