135.0623|
135.0623A| His ita decursis, haec rescribuntur ad ista:
Eutyces Victorinus Marco ad omnia servi.
Qui Domini Jesu Marcello grammata missa
Sic tua venerunt sanctis; triginta dies jam
Transierant postquam ad meritam venere coronam.
Flavia praeclara et Christo vinctissima virgo,
Docta per eunuchos Nerea et Achillea claros
Virgo manere, Deo supremo credere Christo;
Objecto Jesu titulo sibi nominis, isthuc
Truditur ab sponso, quem tempserat, Aureliano;
135.0623B| Quique sequens eunuchorum tentare piorum
Aggreditur mentem, per eos sibi virginis optans
Conciliare animum: spernentes munera sancti
In Christo firmare fidem studuere puellae;
Unde attrectati per sponsum verbere diro
Depositi Terracinam, Rufoque necandi
135.0624A| Suppliciis dantur; quos Rufus igne
Appensos crucians molitur cogere sacris;
Dumque fatentur apostolico baptismate lotos
Nulla unquam se sculptilibus ratione litare,
Puniti mulcta capitis super astra recedunt.
Auspicius quorum rapuit sacra corpora noctu,
Discipulus felix, quo Flavia crevit alumno,
Naviculaque vehens Domitillae in praedia duxit,
Ac sanctae juxta Petronillae busta locavit,
Mille et quingentis distantia passibus Urbe,
135.0624B| Quae nos, Auspicio narrante, accepimus acta.
Floreat ergo tuae nobis dilectio curae,
Mittereque acceleres qui nobis vestra revelet,
Nostra tibi, fraterna salus illustret utrosque,
Laetior affectus tripotenti luce coruscet.