135.0765|
135.0765A| Eusebius praesul fortis vibrat arma fidei,
Liberiumque dolet manui cessisse profanae.
Unde furens hostis arcto hunc Constantius antro
135.0765B| Claudit, ubi invictus precibus persistit amicis,
Cornua Titanis replet dum septies orbe.
Emicat hinc claustris, late quoque pace potitur;
Pignora presbyteri rapiunt Orosius atque
Gregorius Sixto addentes in busta Calisti,
Atque Dei ponunt homini titulumque decusque.
Accipit ut pietatis opus pia gesta tyrannus,
Gregorium ejusdem vivum sub funeris urna
Trudit; spirantem sed adhuc Orosius effert
Nec mora defuncti jugat ossibus ossa sepulti.
Cappadocum propulsus adit Dionysius urbem.
135.0766A| Hic quoque persistens validus defungitur exsul,
Optatam capiens patriam sedisque decorem.
Pignora, Basilio magno reddente, beatus
Suscipit Ambrosius, dignoque recondit honore
135.0766B| Eusebius Scythiae tum Basilii petit urbem;
Vercellis rediens demum repetendo cathedram
Martyriique locum, patitur pius arma furentum;
Psalterium aequivoci postquam decoraverat orsis,
Sedem membra requisitam mens accipit aethram.
Rhetorica Victorinus tunc luce cluebat,
Lustrans subjectam facundo dogmate Romam:
Tandem colla ferens fidei veteranus honori,
Impugnat colubrum sale, comit lumine Paulum.