Solon praecipuus, fertur qui natus Athenis,
Finem prolixae dixit te cernere vitae.
Chilon, quem patria egregium Lacedaemona misit,
Hoc prudenter ait te ipsum ut cognoscere possis.
Ex Mitylenaeis fuerat qui Pittacus oris,5
Te, ne quid nimis ut cupias, exquirere dixit.
Thales ingenio sapiens Milesius acri
Errorem in terris firmat non caelitus esse.
Inde Prienaea Bias tellure creatus
Plures esse malos divina voce probavit. 10
Urbe Periander genitus, cui fama Corintho est,
Omnia constituit tecum ut meditando revolvas.
Cleobolus, proprium clamat quem Lindia civem,
Omne, inquit, magnum est quod mensura optima librat.