Iam spectatores animis linguisque favete!
Contio vel pauco tempore tota sile,
Audire ut possis, quicquid recitaverit actor
Imprimis tibi, qui consuluisse cupit!
Non hic illecebras Veneris, non castra Priapi
Atque Thyesteos non canit ille toros,
Non hic ingluviem ventris nec munera Bacchi.
Sit procul omne nefas, sit procul omne scelus!
Erudientur enim iuvenes, qui discere curant,
Quis modus in studiis optimus esse queat,
Qualis praeceptor; studium quod debeat esse,
Per quod virtutis culmen adire queas.
Sidere felici iamiam procede poeta,
Nam tibi doctorum corda favere solent.