Huc ades, o Benedicte, meos neu despice cantus,
huc ades, Orphea dive canende lyra.
Ure puer costum Assyrium redolentibus aris,
ure et odoratis plurima tura focis.
5Digne senex populi precibus votisque potentum,
digne senex, arae cui sacra mille parent,
mille canant: « Pater euge, pater Benedicte », tibi omnis
turba chorusque omnis cantitet: «Euge pater».
Hic vel mille aras tibi, maxime Christe, dicavit,
10 mille arces, mille et moenia, mille tholos,
primus et hic Italae posuit sacrarla genti
et clausit sacros moenia in una choros;
huic et saevities concessit barbara et hostis
armatus miti victus ab ore viri est,
15totque virum ductor et tantis inclytus actis
prostratus geminos corruit ante pedes.
Quid maius radians vidit sol? Et tibi plausit
Christus et e coelo nuntia signa dedit.
Instaura iam tura, puer; cane, sancte sacerdos;
20 ingeminent laudes tympana pulsa novas.