Amphitheatralem podium transcendere saltu
Velocem audivi iuvenem nec credere quivi
Hunc hominem, potius sed avem, si talia gessit.
Et posui huic, fateor, me Dorica vina daturum
Conspicere ut possem tanti nova facta laboris. 5
Aspexi victusque dedi promissa petenti
Atque meo gravior levis extitit ille periclo.
Non iam mirabor sumtis te, Daedale, pinnis
Isse per aetherios natura errante meatus.
Hunc magis obstipui coram qui plebe videnti 10
Corpore, non pinnis, fastigia summa volavit.