Iam sectum per membra chaos, iam Silva, decorem
Nacta suum, vero nomine mundus erat:
Siquid adhuc ruris vetus importabat origo,
Expulit, artifices usque secuta manus,
5Et, nichil obtrectans operi rerumque figuris,
Continuam sese morigeramque dedit.
"In laudem titulosque meos, Natura, repono
Tam bene materias excoluisse rudes:
Induxi rebus formas, elementa ligavi,
10 Concordem numero conciliante fidem;
Asscripsi legem stellis, iussique planetas
Indeclinatum currere semper iter;
Substrinxi mare limitibus; ne terra labaret,
In medio sedit pondere fixa suo.
15Mandavi, calor ethereus produceret herbas -
Quas calor ethereus parturit, humor alat;
Corpora cuncta creet Tellus, resolutaque rursus
Excipiat placido mater amica sinu;
Ex Endelichia mundi res queque creata
20 Sementem vite principiumque trahat."