Pastori magno totum qui tradidit orbem,
Et caeli claves Petro commisit et omne
Christus ovile suum modica de puppe vocato.
Ille deo plenus, hominem dum cernit Hiesum,
5Credidit esse deum natum genitoris et illum
Inquirente deo per saecula vivere clamat.
Denique de superis decimus quia corruit ordo,
Dum nollet laudare deum, locus ipse polorum
Auxiliante deo Petro piscante repletur.
10Quem deus et Christus sublimat honore potenti,
Vt portae mortis nequeant obstare iubenti,
Invitae tanti pateant sed principis ori.
Vmbra quidem Simonis sanat, quos repperit aegros;
Claudit lingua polos et solvit morte ligatos;
15Membra regit membris et mentes mente resolvit.
Praedicat hunc dominus clementi voce beatum,
Cui pater ipse sui geniti patefecit honorem.
Quemque fide stabilem tali cognomine laudat:
"Ecce ego te Petrum dicam, quia vivere Christum
20Cum patre semper ais: haec est confessio Petri.
Aecclesiamque meam super hanc petram aedificabo
Et tibi caelorum claves curamque mearum
In terris ovium tradam: te nempe ligante
Arva polique simul claudentur, apostole Petre.
25Nunc tibi magna datur caelo terraque potestas:
Annuet imperium mundi tibi, Petre, subactum.
Solvere quaeque velis, solventur et omnia sursum.
Pasce meos agnos, si meme diligis", inquit
"Et, lavi niveas proprio quas sanguine caulas;
30Nam cruce complexum totum tibi subiugo mundum.
Me mandante quidem solido quia marmora quondam
Trivisti gressu fidei meditatus honorem,
His plantis furias calcabis in orbe draconis.
Te monstrante viam mundus regesque feroces
35Ad lucem venient dominumque deumque rogabunt,
Vt tecum certam mereantur habere salutem.
Non mare, non tellus, non te superabit Avernum.
Rete capis pisces, verbo post collige gentes;
Evacua tenebras et lucis regna repleto.
40Non mors ulla meos agnos, non ignifer ille
Spiritus adtingat, hominum deceptor et hostis,
Quos tua, Petre, manus sacro concludet ovili.
Te carcer timeat ferrique catena tremescat.
Tu quoque te cinges iuvenis, securus et ibis:
45Ferrea sponte tibi reseret se porta vianti.
Tu claudis gressum, tu caecis reddito visum,
Tu morbos omnes verbi medicamine sana
Et loeto clausos vitae revocare valeto.
Perveniesque crucis senior succinctus ad aram
50Clarificansque deum capies in agone coronam,
Quam mecum genitor clausam tibi servat ab aevo".
Haec tibi dicta deus complevit, apostole Petre;
Teque regente suam reficit per pascua plebem
Et recipit humilem caelis revocante catervam.
55Quas tibi dicemus laudes, lectissime pastor -
O caeli custos, mundi clarissime rector,
Quem deus ad dextram iussit residere tonantis
Te proni petimus: laudum reminiscitor harum
Et placidus nostras digneris noscere mentes,
60Iudicis ante thronum steterint cum carne solutae;
Cumque resurgendi generalis venerit hora,
Poscimus, ad dextram statuas nos omnipotentis,
Ignis ne noceat, sanguis quos diluat agni.
Non nos ob culpas iubeas tunc ire sub umbras,
65Sed pius absolvas cunctorum vincula nostrum
Et patriam lucis gaudens reserato misellis;
In qua "ter sanctus", laudes et cantica regi
Perpetuo celebrant summissa voce beati,
Quem nos laudantes trinum veneramur et unum.