1. Inportuna Veneri
Redit brume glacies,
Redit equo celeri
Iovis intemperies.
Cicatrice veteri
Squalet mea facies:
Amor est in pectore
Nullo frigens frigore.
2. Iam cutis contrahitur,
Dum <flammis> exerceor,
Nox insompnis agitur
Et in die torqueor.
Si sic diu vivitur,
Graviora vereor.
Amor est in pectore
Nullo frigens frigore.
3. Tu, qui colla superum,
Cupido, suppeditas,
Cur tuis me miserum
Facibus sollicitas?
Non te fugat asperum
Frigoris asperitas.
Amor est in pectore
Nullo frigens frigore.
4. Elementa vicibus
Qualitates variant,
Dum nunc pigra nivibus,
Nunc calorem † variant,
Sed mea singultibus
Colla semper inhiant.
Amor est in pectore
Nullo frigens frigore.