1. Latebat in scriptura
Miranda genitura
Dei et hominis;
Per partum virginis
Vnitur creatura
Nature numinis
In dispare natura.
O partium disparium
Mirabilis iunctura,
Remedium nascentium
De carne peritura.
2. Par patris in usya
Discumbit in Maria.
Locum discubitus
Parat paraclytus;
Deletur energia
Maligni spiritus
Et mortis aggressura.
O partium disparium
Mirabilis iunctura,
Remedium nascentium
De carne peritura.
3. Descensus redemptoris
In ortum novi floris
Fecundat loculum,
In quo signaculum
Non reserat pudoris.
Prodit miraculum
De littere figura.
O partium disparium
Mirabilis iunctura,
Remedium nascentium
De carne peritura.
4. Cessat umbra legalis,
Cum vita fit mortalis,
Iudea claudicat,
Que natum abdicat,
Quem pullus subiugalis
Genitum predicat
In virginis fetura.
O partium disparium
Mirabilis iunctura,
Remedium nascentium
De carne peritura.
5. Mater innupta Christi,
Que deo leo dedisti,
O virgo virginum,
Que lumen luminum
Tenebris infudisti,
De festis hominum
Nos transfer ad futura.
O partium disparium
Mirabilis iunctura,
Remedium nascentium
De carne peritura.