1. Prima nostri generis.
Corrupta propagine
Arguitur sceleris
Mens maris et femine,
Sed levator oneris
Oriens ex virgine
Lavit noxe veteris
Crimen sine crimine.
Hic est, de quo legitur
In Regum volumine,
Qui post Saul ungitur.
2. Desperans in senio
De promisso munere
Saray pre gaudio
Cachinnatur temere.
Enervat luctatio
Iacob in itinere.
Concipit in bivio
Thamar dato federe.
Hic est, de quo legitur
In Regum volumine,
Qui post Saul ungitur.
3. Ecce vermis oritur
De manna Iudaico,
Quo pectus reficitur
Gentili famelico.
Novum nectar liquitur
Tribunali celico,
Et iam mundus pascitur
Celesti viatico.
Hic est, de quo legitur
In Regum volumine,
Qui post Saul ungitur.
4. Deferens ad spiritum
Vim mordacis littere
Misit unigenitum
Pater tectum podere.
Mel presumit vetitum
Ionathas attingere,
Quod <de quercu> proditum
Viderat effluere.
Hic est, de quo legitur
In Regum volumine,
Qui post Saul ungitur.
5. Cum nichil amarius
Esset prius fluvio,
Fit per lignum fluvius
Dulcis e contrario.
Nam minas, quas intulit
Vetus superstitio,
Sue Christus expulit
Crucis beneficio.
Hic est, de quo legitur
In Regum volumine,
Qui post Saul ungitur.