Nomine Pandecten proprio vocitare memento
Hoc corpus sacrum, lector, in ore tuo.
(0728A)Quod nunc a multis constat Bibliotheca dicta:
Nomine non proprio, ut lingua Pelasga docet.
Inque hoc dicta Dei conduntur mystica summi,
De quibus egregius vates in ore canit (Psal. CXVIII):
Est mihi lex Domini dulcis super omnia mella,
Charior atque auri millia multa super.
Strenuus hanc Domini famulus custodiet arcem,
Cui merces coeli perpes in arce manet.
Codicis illius quot sunt in corpore sancto
Depictae formis litterulae variis;
Mercedes habeat, Christo donante, per aevum
Tot Carolus rex, qui scribere jussit eum.
Haec dator aeternus cunctorum, Christe, bonorum,
Munera de donis accipe sancta tuis.
Quae tibi devoto Carolus rex pectore supplex
(0728B)Nominis ad laudem obtulit ecce tui.
Quem tua perpetuis conservet dextra diebus,
Ut felix tecum vivat in arce poli.