(0794A)
Praesul amate, precor, hac tu diverte, viator,
Sis memor Albini ut praesul, amate precor.
O mea chara domus, habitatio dulcis, amata,
Sis felix semper, o mea chara domus.
Sophia sancta Patrum tectis servatur in istis,
In te discatur sophia sancta Patrum.
Tu valeas, vigeas donis [his] inclyta semper,
In sophiae cultu tu valeas, vigeas.
Rustica turba tuo habitet sub tegmine nunquam;
Sit procul e tecto rustica turba tuo.
Protegat atque regat Christi te gratia semper,
Cum sociis pariter, protegat atque regat.