Salāx taberna vosque contubernālēs,
ā pilleātis nōna frātribus pīla,
sōlīs putātis esse mentulās vōbīs,
sōlīs licēre, quidquid est puellārum,
confutuēre et putāre cēterōs hircōs?5
An, continenter quod sedētis insulsī
centum an ducenti, nōn putātis ausūrum
mē ūnā ducentōs irrumāre sessōrēs?
Atquī putāte: namque tōtius vōbīs
frontem tabernae sopiōnibus scrībam.10
Puella nam mī, quae meō sinū fūgit,
amāta tantum quantum amābitur nūlla,
prō quā mihī sunt magna bella pugnāta,
consēdit istic. Hanc bonī beātīque
omnēs amātis, et quidem, quod indignum est,15
omnēs pusilli et sēmitāriī moechī;
tū praeter omnēs ūne dē capillātis,
cunīculōsae Celtibēriae fīlī,
Egnāti. Opācā quem bonum facit barbā
et dens Hibēra dēfricātus ūrīnā.20