Sic est profectò, sic est:
Dissuaviando pasci
Teneri volunt amores.
Atque illud est opinor
5Homini, esse homo quamobrem
Amet: omnis hîc Venustas,
Et quicquid est Amorum,
Et quicquid est Lepôrum:
In hoc Lubentiae omnes,
10Omnesque Gratiae insunt.
Iovi Dijsque magnis
Me proximum esse duco,
Quoties mihi labella,
Quoties mihi papillas,
15Et hos tuos ocellos,
Et istud os hiulcum,
Et laevia ista colla
Contingit osculari.
Utinamque mî labella,
20Utinam mihi papillas,
Et hos tuos ocellos,
Et istud os hiulcum,
Et laevia ista colla
Meo modo, Rosilla,
25Ad millia usque centum
Contingat osculari.
Tunc non Iovi modò & Dijs
Me proximum esse ducam,
Ipsis sed & videbor
30Agere ex Dijs triumphum.