Diva, subjectas domina coronas
Quae manu spargis, soliisque gaudes,
Aut adoratis populo minori
Ludere sceptris;
Diva, quam rebus trepidis paventes
Ambiunt reges, et emace voto
Ducit in partes facilem moveri
Miles iniquus.
Quae simul curru volitans secundo
Castra lustrasti, placidasque visa
Ire per turmas, vel amica dextra
Tollere signa:
Ilicet campo fugiunt, latentes
Grandibus tecti clypeis Timores,
Et Metus vani generosa circum
Signa volantes.
Ilicet vires redeunt amorque
Martis insani; cupidusque laurum
Morte venalem rapuisse gliscit
Mentibus ardor.
Perge bellaces animare turmas,
Unde Mars ortus: neque jam Polonis
Hospes in castris, ubi te sodalem
Horrida virtus,
Et triumphatos celebrare Tureas
Laeta ventoso vaga Fama curru,
Et coronali sequitur superbus
Fronte Triumphus.
Dum Sigismundo violentus armat
Omnibus ripis Tanais cohortes,
Et Dahae Thracum maculosa tergent
Alma cruore.
Regium stipant latus, irrepexo
Crine formosus labor, et futuri
Mens sagax auspex, et adulta bello
Consilii vis.
Quem fatigatum modo Sol diurna
Ipse jam fessus simili labore
Vidit, hunc cernunt vigiles moventem
Sidera curas.
Lucis in partem miserata longos
Fratris errores venit, Indicoque
Dum latet ponto, vacuum pererrat
Cynthia coelum.
At Sigismundus vigil obstinato
Torquet insomnes animos tumultu,
Nec vices mutans jubet imperatos
Vincere somnos.
Larga devoti Pietas cruoris,
Et Fides nullo violata fuco
Et tenax aequi scelerumque vindex
Castra sequuntur.
Tanta virtutum tibi dum Polonis
Militat castris acies, propinquae
Terror Europae tibi cessit uni
Thracius hostis.
Nec minax ultra pharetra insolenti
Tartarus, laxo famulatur arcu,
Aut pigras inter meditatur alta
Otia silvas.
Ibat hibernae similis procellae
Arctici victrix acies tyranni,
Et cruentandus Scythicis fremebat
Bosphorus armis.
Qualis in rupes fremit, et minaci
Ister undarum cumulo, minorum
Fluminum dives spoliis, Apriles
Colligit iras.
Ni Sigismundi generosus ardor
Intumescentes prope funerandae
Littus Europae tenuisset alto
Objice fluctus.
Empta virtuti modico cruore
Vilior laus est: meliorque magnam
Impedit frontem graviore laurus
Empta periclo.
Quo tuum, princeps, reditum triumpho
Moesiae valles, Hypanisque tuto
Alveo liber celebrent, et aurea
Phasidis ora?
Dum tuos, victor, Getica revisis
Caede formosus, spoliisque Thracum
Altior, laeto populos frementes
Aspicis ore.
Quas tibi moles Pario labore
Ponat Arctoae monumenta cladis
Fama, seu mavis Scythico triumphos
Marmore signet?
Illa per fastos memores sacrabit
Nomen aeternis titulis, tuamque
Inde virtutem nova posterorum
Mittet in ora.
Hoc habe pulchri pretium laboris,
Frigido vivas cineri superstes,
Grata quem pubes populusque longo
Eximet aevo.
Nec Ladislaus pavidos in hostes
Fulminat magno levior parente,
Dum patri sese probat, et paternas
Exserit artes.
Quantus armato metuendus astro
Surgit Orion, timidamque plebem
Siderum terret, rutilusque stricto
Fulgurat auro.
Festa bellorum tibi tradit ultro
Regna felici moderanda sceptro,
Et pharetratas animosa mittit
Moschua turmas.
Hoc tuae, princeps, satis est juventae
His rudimentis populos regendi
Patrias artes, et avita disce
Sceptra movere.